خاندان

”خانوادۂ اشرفیہ“ اپنی چھ سو سالہ تاریخ کے کسی دور میں عقیم نہیں رہاہے؛ بلکہ ہمیشہ اس کی آغوش میں ایسی شخصیتیں جنم لیتی رہیں جنھوں نے علم وفضل، تقویٰ ودیانت، فکروفن، تصنیف وتالیف، اور اصلاح وتربیت کے میدان میں وہ گرانقدر اور عظیم الشان کارنامے انجام دئے ہیں جن کے تشکّر وامتنان سے ہزاروں زبانیں تراور جن کے احترام کے لیے ہزاروں سینے معمور ہیں، اور کوئی عظیم سے عظیم تر علمی وفکری طاقت اور بڑے سے بڑا انقلاب بھی ان مذہبی اکابر اور دینی پیشواؤں کی کی عقیدت کے پرچموں کو سرنگوں نہ کرسکا۔
غوث العالم حضرت مخدوم سلطان سیّد اشرف جہانگیر سمنانی رحمتہ اللّٰه علیہ کی فیض روحانیت کے بدولت اس عظیم خانوادہ کی ہمیشہ یہ خصوصیت رہی ہے کہ یہاں اچھے مصنفین، دقّاق ودانشور مفکرین، صاحب طرز ادباء، شعلہ بیان خطباء، خوش فکر وخو ش طبع شعراء ، بڑے بڑے ماہرین علوم جدیدہ اور عظیم روحانی پیشواءتقریباً ہردور میں موجود رہے ہیں؛ اس لیے بجا طور پر ہم کہہ سکتے ہیں ؎

خانوادۂ اشرفیہ کے متأخرین اصحابِ علم ودانش، آدابِ قرطاس وقلم سے آشنااور تصنیف وتالیف کی زلف برہم کی مثالگی کرنے والے تابندہ نقوش کی صف میں حضرت مولانا سید موصوف اشرف صاحب قبلہ کا بھی شمار ہوتا ہے، بلاشبہ اس خاندان میں موجودہ دور کے اصحاب قلم حضرات کے زمرہ میں آپ کی حیثیت ایک ایک اچھے مصنف م بہترین خطیب اور تجربہ کارمدرس کی ہے۔
آپ کا تعلق حضرت سید شاہ یحیٰ اشرف سجادہ نشیں رحمتہ اللّٰه علیہ کی شاخ سے ہے، اور آپ کا شجرۂ نسب سولہ واسطوں سے سید السالکین، غوثِ زماں، عارفِ ربّانی حضرت محبوبِ یزدانی سلطان سید اشرف جہانگیر سمنانی رحمتہ اللّٰه علیہ سے مل جاتا ہے۔

اَجداد ووالد ماجد

”ایں خانہ ہمہ آفتاب استْ“ کے مانند آپ کے خاندان میں سبھی حضرات اپنے اپنے زمانہ کی اہم شخصیت کے مالک اور عظیم روایات و اعلیٰ قدروں کے حامل تھے، تاہم مجھے جہاں تک معلوم ہواہے کہ آپ کے پردادا حضرت سید شاہ حمایت اشرف رحمتہ اللّٰه علیہ کوفارسی اوراردو زبان پر کامل دَسترس حاصل تھا، جس کا ثبوت دونوں زبانوں میں ان کی تصانیف ہیں، زبان فارسی میں آپ کی تصنیف ” عمدۃ الصحائف“ اور ”ظرائف شگرفیہ“ ہے، متأخر الذکر کتاب میں خاندان اشرفیہ کے عمائدین بالخصوص سجادہ نشینان آستانۂ عالیہ کے حالات وواقعات بیان کیے گئے ہیں، اسی طرح شعروشاعری کا بھی آپ کو اچھا ذوق تھا، جس کا اثہار آپ کی کتاب ” گلزار اشرفی “اور ”میلاد غریب“ سے ہوتا ہے، اوّل الذکر کتاب میں مخدوم پاک کے حالاتِ زندگی کو اشعار کے قالب میں ڈھال کر بڑے ہی لطیف پیرائے میں بیان کیا گیا ہے، جو دوسو سے زیادہ صفحات پر پھیلاہواآپ کا ضخیم دیوان ہے، جب کی ”میلاد غریب“ نعتیہ اشعار پر مشتمل ہے، اسی طرح آپ کے جد بزرگوار حضرت سید شاہ خلیل اشرف رحمتہ اللّٰه علیہ اور اور پدر بزرگوار حضرت سید شاہ محمد فاضل اشرف رحمتہ اللّٰه علیہ بھی بڑے متقی وپرہیزگار اور نیک وصالح بزرگ تھے، جن کی تعریف میں علاقہ کے اکثر افراد رطبُ اللّسان ہیں، آپ کے جد بزرگوار حضرت سید شاہ خلیل اشرف رحمتہ اللّٰه علیہ دینی وجاہت وکمال کے ساتھ ہی قصبۂ بسکھاری کے ایک بڑے متمول زمیندار بھی تھے، اور غرباء پروری وفقراء ومساکین کی امداد ان کا شیوہ تھا، کہتے ہیں کہ قصبۂ بسکھاری کی تقسیم بھی انھیں کے ہاتھوں عمل میںآئی۔ جد بزرگوار کے مانند آپ کے والد گرامی حضرت سید شاہ محمد فاضل اشرف رحمتہ اللّٰه علیہ بھی متعدد دینی خصوصیات کے مالک تھے، جس میں ان کی سنجیدگی، عبادت وریاضت اور زہدوتقویٰ اور جذبۂ دعوت وتبلیغ ضربُ المثل تھی، مجھے معلوم ہوا ہے کہ انھیں کی دعوت الی اللہ کے سبب یہاں کی بہت سی مشرکانہ رسوم اور جاہلانہ بدعتوں کا خاتمہ ہوا، ان کی سب سے بڑی خصوصیت یہ تھی کہ وہ صوم وصلوٰۃ کے انتہائی پابند اور ”رَجُلٌ قَلْبُہٗ مُعَلَّقٌ فِی الْمَسْجِدٌ“ کے مصداق تھے، ان کی پابندئ نماز کا یہ حال تھا کہ سفر وحضر کہیں بھی اور کسی حالت میں آپ کی نماز قضا نہ ہوتی تھی، حتّٰی کہ جب آپ کھیت یاکھلیان میں ہوتے تو بھی وحدہٗ لاشریک کی عبادت وریاضت سے کشت زارِ حیات اور گلستانِ روح کو شاداب رکھتے تھے، حضرت مولانا سید موصوف اشرف صاحب کا بیان ہے کہ:۔

ان کی زندگی کا یہ آخری واقعہ اس امر کا آئینہ دار ہے، جسے خود مولانا نے بیان فرمایا ہے۔ وہ فرماتے ہیں کہ:۔

”والد صاحب کی یہ عادت تھی کہ وہ رات کے تہائی حصہ میں بیدار ہوجاتے اور ضروریات سے فارغ ہوکر وضو کرکے خود اپنے ہاتھ سے چائے بناکر پیتے، نماز تہجد ادا کرتے اور پھر اوراد واذکار میں مشغول ہوجاتےتھے، یہاں تک کہ نماز فجر کی ادائیگی کے بعد نماز اشراق وچاشت پڑھ کر ہی مصلّے سے اٹھتے تھے، اور یہی ان کا ہمیشہ کا معمول تھا، زندگی کے آخری ایّام میں جب ضعف ونقاہت بہت زیادہ بڑھ گئی اور میں نے دیکھا کہ والد صاحب کو اس سے زیادہ پریشانی ہوتی ہے تو اس وقت کے ایک بڑے عالم کی زبانی میں نے کہلوایا کہ ”نماز تہجد فرض نہیں ہے آپ ترک کردیں چونکہ سحر خیزی سے از حد تکلیف ہوتی ہے“ والد گرامی نے عالم صاحب کی بات کو مسکراکر ٹال دیا اور بڑاہی حسین جواب دیا، فرمایا کہ ”محترم! جس چیز کو میں نے زندگی بھر عزیز رکھا ہو اب عمر کے آخری لمحات میں اسے کیسے چھوڑ سکتا ہوں“ پھر آپ کا یہ عمل عمر کے آخری ایّا م تک جاری رہا، یہاں تک کہ ۱۱/ اپریل ۱۹۷۴؁ء کو پچاسی سال کی عمر میں جان جانِ آفریں کے حوالے کردی“۔

ولادت وطفولیت

بسکھاری شریف کے مشہور ومردم خیز قصبہ میں ۳۱/ جنوری ۱۹۳۹میں آپ کی پیدائش ہوئی، یہی تاریخ بسکھاری مکتب میں درج رجسٹر ہے، گو کہ عربی اسناد کے مطابق آپ کی تاریخ پیدائش ۲۲/ مئی ۱۹۴۰ ہے۔
مولاناکا بچپن گھر کے بڑے خوشگوار ماحول میں گذرا، تعلیم کی طرف بچپن سے فطری رجحان تھا، خاندان کی تہذیبی وثقافتی روایات نے آپ کے ذہن پر بڑے گہرے اور دور بین اثرات چھوڑے، جس کی وجہ سے آپ کی طفولیت اچھے علمی وتہذیبی اور اخلاقی ماحول میں پروان چڑھی، اور بچپن ہی میں تعلیم کا اچھا شعور پیدا ہوگیا۔

ابتدائی تعلیم

آپ کی ابتدائی تعلیم بسکھاری مکتب میں ہوئی، اور مکتب کی تعلیم مکمل کرنے کے بعد آپ نے ضلع فیض آباد ہی کے مشہور قصبہ جلالپور کے ایک اہم مدرسہ میں عربی وفارسی کی ابتدائی کتابیں پڑھیں اور وہیں شرح جامی تک تعلیم مکمل کی، اس دوران آپ اپنی جماعت میں امتیازی شان کے مالک تھے، اور آپ کی علمی صلاحیتوں کی وجہ سے اکثر طلباء آپ کا احترام کرتے تھے۔

اعلیٰ تعلیم اور اہم اَساتذہ

اس کے بعد آپ نے اعلیٰ تعلیم کے حصول کے لیے اہلسنت والجماعت کی عظیم دینی درسگاہ ”دارلعلوم اشرفیہ“مبارکپور اعظم گڈھ کا قصد کیا، جو اپنے آغوش میں علوم وفنون کا سرچشمہ اور تحقیق وتدقیق کا بحرِ ناپیدا کنار لیے ہوئے تشنگانِ علوم کو سیراب کررہاتھا، آپ بھی اس بحر کی شناوری اور غواصی میں مشغول ہوگئے۔
دارالعلوم اشرفیہ کے روزوشب ، علمی ماحول اور عباقرۃ الزماں اساتذۂ کرام کی صحبت نے آپ کی علمی شعور کو پختگی اور تحقیق وتدقیق ، طلب وجستجو اور مطالعۂ کتب کا اعلیٰ ذوق پیدا کردیا، اشرفیہ کے قیام کے دوران ہی آپ نے الٰہ آباد بورڈ سے عالم ،فاضل وغیرہ کے امتحانات پاس کرکے اسناد حاصل کیں۔
آپ کے اہم اساتذہ میں ہر ایک اپنی ایسی منفرد وممتاز صلاحیت اور عظیم شخصیت کا مالک ہے، جو کسی تعارف کے محتاج نہیں؛ بلکہ ان کا نام لینا ہی ان کا جامع تعارف ہے، ان حضرات کے اسمائے گرامی یہ ہیں:۔
(۱) محسن قوم وملّت حضرت حافظ ملّت علّامہ عبدالعزیز مرادآبادی رحمتہ اللّٰه علیہ ، (۲) بحرالعلوم حضرت مولانا مفتی عبدالمنان صاحب قبلہ،(۳) محقق کبیر حضرت علّامہ ظفر ادیبی صاحب ،(۴) شیخ المعقولات والمنقولات حضرت حافظ عبدالرؤف صاحب رحمتہ اللّٰه علیہ ، (۵)حضرت مولانا سید حامد اشرف صاحب قبلہ،(۶) حضرت مولانا محمد شفیع صاحب رحمتہ اللّٰه علیہ ، (۷)شیخ القراء حضرت مولاناقاری محمد یحیٰ صاحب قبلہ وغیرہم۔

کثرتِ مطالعہ وکتب بینی

مطالعہ اور کتب بینی کےآپ بڑے شیدائی تھے، اور آپ کامطالعہ تعلیم کے بعد بھی برابر جاری رہا، خاص طور پر عصری اسلوب میں اسلامیات کے متعلق جو بھی اہم کتاب مارکیٹ میں آتی آپ اس کا مطالعہ ضرور کرتے تھے۔
آپ کے عہد میں کمیونزم اور اشتراکیت کا بڑا زور تھا، اور لینن وکارل مارکس کے فلسفیانہ طلسماتی نظریات نے نوجوانوں اور بعض دانشوروں کے عقل وخرد کو اس قدر مسحور کیا تھا کہ وہ ایک فلسفۂ اشتراکیت ہی کو دانشوری اور صحیح انسانی حقوق کا علمبردار سمجھتے تھے، آپ نے وقت کے اس اہم اور زبردست فتنہ کا مقابلہ کرنے کے لیے اس موضوع پر بہت زیادہ مطالعہ کیا، اور کافی علمی مواد فراہم کرکے بہت سے کمیونسٹ ذہنیت رکھنے والوں کا نہ صرف یہ کہ مقابلہ کیا ؛بلکہ اپنی مجلسی گفتگو اور مباحثوں میں اس کے طلسماتی پردہ کو چاک کرکے اس کی ناپاک وگندی حقیقت کو عیاں کردیا، اور بہتوں کو اپنے سابقہ نظریات بدلنے پر مجبور کردیا، اس طرح آپ نے اسلامیات کا باضابطہ مطالعہ کرکے اس کی حقیقی روح تک پہونچنے کے لیے پوری کوشش کی۔
یہ حقیقت ہے کہ پائدار اور صحیح مطالعہ کے لیے دماغی سکون اور یکسوئی ضروری ہے، یہ صفت مولانا کے اندر پائی جاتی تھی، آپ کی کتب بینی کا بڑا عجیب عالَم تھا، جب آپ کسی کتاب کے مطالعہ میں مصروف ہوجاتے تو کھانا، پینا غرضیکہ ہر چیز سے غافل ہوجاتے تھے، آپ کی طالب علمی کا یہ واقعہ اس بات کی روشن دلیل ہے کہ شرح وقایہ جیسی ضخیم کتاب کا مطالعہ آپ ایک نششت میں مکمل کرلیتے تھے۔

بیعت وارادت

بیعت کے لیے آپ کی طبیعت سب سے زیادہ اپنے والد گرامی کی طرف مائل ہوئی، جو سلسلۂ اشرفیہ کے ایک خداترس بزرگ تھے، اور بہت لوگ آپ کے ہاتھ پر بیعت ہوچکے تھے، چنانچہ آپ بھی انھیں کے ہاتھوں پر بیعت ہوکر داخلِ سلسلہ ہوئے، اور اجازت وخلافت سے نوازے گئے، آپ اپنے والد گرامی کے جانشیں بھی ہیں۔

دینی خدمات

تعلیم سے فراغت کے بعد ہی سے آپ مختلف میدانوں میں دینی خدمات اور فریضۂ دعوت وتبلیغ کی ادائیگی میں سرگرم عمل رہے اور ہر طرح دینی خدمت کی انجام دہی کی کوشش کرتے رہے، خاص طورپر اس فریضہ کی ادائیگی کے لیے آپ نے درس وتدریس، تصنیف وتالیف اور وعظ وتقریر کے طریقوں کو اپنایا جن کی قدرے تفصیل درج ذیل ہے۔

دَرس وتدریس

آپ نے مسند تدریس کو ایک زمانے تک زینت بخشی، اور جس ادارہ میں بھی رہےوہاں کی تعلیمی حالت سدھار کر مدرسہ کوکافی فروغ دیا، دارالعلوم اشرفیہ سے فراغت کے بعد ۱۹۶۰؁ء میں جامعہ عربیہ جہانگیر گنج فیض آباد میں بحیثیت صدرالمدرسین آپ کی تقرری ہوئی، اور آپ نے وہاں بڑی جانفشانی سے تعلیم دینا شروع کردیا، آپ کی ان مخلصانہ کوششوں کے بدولت چند ہی دنوں میں مدرسہ کا تعلیمی معیار انتہائی اعلیٰ ہوگیا اور پانچ سال تک آپ اپنی شب وروز کی مسلسل خدمات سے مدرسے کو فروغ دیتے رہے، یہاں تک کہ ۱۹۶۵؁ء میں ارکانِ مدرسہ کی جانب سے کچھ خلافِ طبع باتیں سرزد ہوجانے کی وجہ سے استعفیٰ دے کر وہاں سے چلے آئے۔
تعلیمی وتدریسی سفر کی اس مختصر سی مدت میں اپنی تدریسی محنتوں اور کاوشوں کی وجہ سے آپ نے کافی شہرت حاصل کرلی تھی، اس لیے جیسے ہی آپ نے مدرسہ عربیہ جہانگیر گنج میں اپنا استعفیٰ پیش کیا، اس کے فوراً ہی بعد کئی مدرسوں سے آپ کے لیے دعوت نامے آگئے؛ لیکن ان تمام مدارس میں آپ نے مدرسہ ضیاء العلوم پراناگورکھپور کو وہاں کے اراکین ے پیہم اصرار پر ترجیح دیا، اور ۱۹۶۵ میں صدرالمدرسین کی حیثیت سے مدرسہ کا انتظام واہتمام سنبھال لیا، اور چند ہی دنوں میں وہاں کی تعلیمی اصلاح فرماکر اس ادارہ کو فروغ دیا، جس کے باعث جلد ہی آپ وہاں کے ہردل عزیز ہوگئے، اور بڑی کامیابی کے ساتھ ۱۹۷۲ تک مدرسہ کو ترقی دیتے رہے، اس کے بعد خطیب الاسلام پیر طریقت الحاج حضرت مولانا سید کمیل اشرف صاحب قبلہ جانشین حضور مخدوم ثانی دام ظلہ النورانی، کے زور دینے اور اور کچھ گھریلو مصروفیات کے باعث آپ نے وہاں استعفیٰ پیش کرکے اور وہاں کی عوام کو دل شکستہ واشکبار چھوڑ کر اپنے ہی قصبہ بسکھاری میں جانشین حضور مخدوم ثانی کے زیر اہتمام چلنے والے مدرسہ دارالعلوم محبوبِ یزدانی کا انتظام سنبھال لیا، اور اسے بے پناہ ترقی دی۔ دارالعلوم محبوب یزدانی آپ کی آمد کے وقت ایک ایسے مکتب کی شکل میں تھا جس میں صرف چند طلباء وطالبات زیر درس تھیں، لیکن تا ہنوز اس کا کوئی مستقل وجود نہ تھا، کبھی کسی درخت کے نیچے تعلیم ہوتی تھی تو کبھی چھپر تلے، حتّٰی کہ مدتوں تک حضرت جانشین مخدوم ثانی دام ظلہ النورانی کے گھر میں تعلیم ہوتی رہی، لیکن رفتہ رفتہ حضور مخدوم ثانی رحمتہ اللّٰه علیہ کی دعاؤں ، حضرت جانشین مخدوم ثانی کی دینی تڑپ اور مخلصانہ کوششوں اور حضرت مولانا سید موصوف اشرف صاحب قبلہ کی جہد مسلسل وسعی پیہم نے اس چھوٹے سے مکتب کو ثری کی پستیوں سے ثریا کی رفعتوں تک پہونچادیا، اور اب خدا کا شکر ہے کہ دارالعلوم محبوب یزدانی صرف مکتب ہی نہیں رہ گیا؛ بلکہ وہ فکروفن، علم وآگہی، شعور ودانش، تحقیق وتدقیق، تصنیف وتالیف غرضیکہ ہراسلوب اور ہرمیدان میں دینی خدمات کا ایک عظیم ومنفرد ادارہ بن چکاہے۔ یہانتک کہ مکتب کایہ عالم ہے کہ یہ اس علاقے کا سب سے بڑا مکتب ہے، جس میں چھ سو طلباء وطالبات زیرِ درس ہیں۔
اس کے علاوہ علماء وحفاظ اور قراء کی ایک زبردست ٹیم، عربی وفارسی اور حفظ وقرأت کی تعلیم دینے میں مصروف ہیں، حضرت جانشین مخدوم ثانی اس کی سرپرستی واہتمام اور حضرت مولانا سید موصوف صاحب قبلہ اس کا انتظام سنبھالے ہوئے ہیں، اور ان کا حال تو یہ ہے کہ مدرسہ ہی آپ کی ساری مصروفیات ومشغولیات کا مرکز ہے، اور انھیں ہر وقت مدرسہ کی تعمیر وترقی کی ہی فکر دامن گیر رہتی ہے۔

تصنیف وتالیف

تصنیف وتالیف کا ذوق آپ کو زمانۂ طالب علمی ہی سے تھا، چنانچہ آپ نے متعدد واہم قیمتی مقالات لکھے، جو شائع ہوکر اہل علم کے حلقوں میں کافی مقبول ہوئے، انھیں میں سے دو مقالات سوانح نگاری کے سلسلے میں بڑے پُر مغز تھے، جو پمفلٹ کی شکل میں شائع ہوئے، جن میں ایک مقالہ وہ تھا جو آپ نے مشہور تاریخی قصبی جائس کے خاندان سادات وسلسلۂ اشرفیہ کے ایک مشہور بزرگ سید شاہ جلال اشرف سجادہ نشین آستانۂ عالیہ اشرفیہ رحمتہ اللّٰه علیہ جائس کی سوانح عمری ”مجذوب کامل“ کے عنوان سے تحریر فرمائی تھی، اور دوسرا مقالہ وہ ہے جو آپ نے بسکھاری کی خاندان سادات کی مشہور ولیہ حضرت سیدہ میمونہ والدہ جانشین حضور مخدوم ثانی حضرت مولانا سید شاہ کمیل اشرف صاحب الاشرفی الجیلانی رحمتہ اللّٰه علیہ کے انتقال پُرملال پر ان کی پاکیزہ ومثالی زندگی اور ان کے تقویٰ وطہارت سے متأثر ہو کر ”میمونہ بی بی“ کے عنوان سے تصنیف فرمایا تھا؛ لیکن تاحال کسی مستقل تصنیف کی طرف آپ کی توجہ نہیں ہوئی تھی اور نہ ہی اس کا کوئی ارادہ ہی تھا، مگر آج سے دو سال قبل آپ کے ساتھ ایک ایسا زبردست حادثہ پیش آیا جس نے آپ کے جسم وجان کے ساتھ ہی ساتھ آپ کے علم وفکر اور ذہن ودماغ کی چولیں بھی ہلادیں، اور آپ کی زندگی میں ایک نمایاں انقلاب برپاکرکے آپ کو مستقل طور پر تصنیف وتالیف کی جانب متوجہ کردیا۔
۱۹/ اپریل ۱۹۹۲؁ء کو آپ بمبئی سے گھر آرہے تھے کہ راستے میں آپ کے بدن میں آکسیجن کی کمی کے باعث آپ کی طبیعت سخت خراب ہوگئی، اور کسی بھی طرح بچنے کی کوئی امید باقی نہ رہ گئی ؛ لیکن ربّ کریم کی عنایتوں سے آپ کو دوبارہ صحت وسلامتی اور نئی زندگی ملی، پھر آپ نے اس حادثہ سے دوچار ہوکر یہ احساس کیا کہ میں نے اپنی تریپن سالہ زندگی صرف درس وتدریس اور خطابت وتقریر میں گذاردی؛ لیکن اب تک کوئی ایسا مستحکم ومستقل تصنیفی کام نہیں کیا جس سے دنیا کے سامنے ہماراکوئی علمی کارنامہ آسکے، اور اس کے بدولت خادمین دین کی ان نفوس قدسیہ کی فہرست میں میرابھی نام آسکے، جنھوں نے دینِ حنیف کی نشرواشاعت کے لیے اپنی قلمی توانائیاں اور تصنیفی سرگرمیاں وقف کردیں، یہی وہ احساس تھا جس نے آپ کے دل میں مستقبل میں بہت کچھ کرنے کا عزم وحوصلہ پیدا کردیا۔
آپ نے مستقل تصنیفی سفر کا آغاز مشہور صوفی بزرگ غوث العالم حضرت مخدوم سلطان سید اشرف جہانگیر سمنانی رحمتہ اللّٰه علیہ کی سوانح حیات سے کیا اور ”حیات غوث العالم“ کے نام سے ایک ضخیم کتاب تصنیف فرمائی، جو آپ حضرات کے ہاتھوں میں ہے، اس کتاب کی تصنیف کے بعد آپ کا یہ تصنیفی سلسلہ جاری ہے، اور” خطباتِ ہند “کے نام سے آپ کی تقاریر کا مجموعہ زیرِ طبع ہے، اور ”تاریخ خانوادۂ اشرفیہ “ زیر ترتیب ہے، جس میں اس مقدس خانوادہ کی جملہ عبقری شخصیات کی حیات وخدمات پراجمالی روشنی ڈالی گئی ہے۔ اور اس کے بعد مزید تصنیفی کام کو آگے بڑھانے کی کوششیں بھی جاری ہیں۔

وعظ وتقریر

اچھے مدرّس اور بہترین مصنّف اور باکمال عالمِ دین ہونے کے ساتھ ہی ساتھ آپ ایک بلند پایۂ خطیب بھی ہیں، عہد شباب میں آپ کی تقریروں نے ایک دھوم مچادی تھی، اور ہر اسٹیج سے آپ کے لیے صدائے تحسین وآفریں ہی بلند ہوتی تھی، اور کسی جلسہ میں آپ کی شرکت اس کی کامیابی کی ضمانت ہوتی تھی، آپ کی تقریریں اپنی چند نمایاں صفات وخصوصیات کی وجہ سے دیگر مروّجہ تقریروں سے ممتاز ہیں، ان تقریروں کی جو بنیادی خصوصیات ہیں وہ یہ ہیں کہ ان میں مواد کی فراہمی، نکتہ آفرینی، قرآن وحدیث سے استدلال، اور علمی واصلاحی وتربیتی اسلوبِ بیان اپنایا گیاہے، حقیت تو یہ ہے کہ عوام کی واہ واہ اور لوگوں کی آہ آہ سے بے نیاز ہوکر آپ نے تاریخِ اسلام، سیرتِ رسول، تمدنِ اسلام اور قرآن وحدیث کی تعلیمات کو اپنی تقاریر میں سموکر اسلام کے آفاقی پیغام کو عام کرنے اور اسے لوگوں تک پہونچانے کی کوشش کیا ہے، اور اس میدان میں بڑی حد تک کامیابی سے ہمکنار بھی ہوئے ہیں، چونکہ موجودہ وقت میں غلبۂ امراض کے باعث آپ نے تقریر کرنا تقریباً چھوڑ دیا ہے، اس لیے آپ کی تقریروں کا مجموعہ ”خطباتِ ہند “ کے نام سے جلد ہی منظرِ عام پر آنے والاہے۔

سَعادتِ حج وزیارت

آپ درس وتدریس میں مصروف تھے کہ آپ کے دل میں شوق حجاز انگڑائیاںلینے لگا اور آپ نے زیارتِ حرمین شریفین کاقصد کیا، اللہ نے اس نیک مقصد کے لیے وسائل پیدا فرمادیا، اور ۱۹۸۵ میں آپ حج وزیارت کی سعادت سے مشرف ہوئے۔

مزَاجی خُصوصیَّات

آپ متعدد ایسی صفات وخصوصیات کے مالک ہیں جو بہت کم لوگوں میں پائی جاتی ہیں، اور جن کی وجہ سے آپ کی شخصیت دیگر لوگوں میں ممتاز نظر آتی ہے۔
آپ کی چند خصوصیات یہ ہیں کہ آپ اصول وقوانین کے انتہائی پابند ، راسْت بازی ودیانت داری آپ کا شیوہ، ہر کام میں اخلاص اور صبر وتحمل کی بے پناہ قوت، جذبۂ انتقام سے بہت دور، اعلیٰ ظرفی، خوش طبعی، نکتہ آفرینی و شگفتہ مزاجی وغیرہ آپ کی چند نمایاں خصوصیات ہیں۔
اصول وقوانین کی پابندی کا یہ عالم ہے کہ آپ کے اندر اس کے برتنے میں کچھ بھی نرمی اور لچک نہیں پائی جاتی ہے، اور نا ہی آپ اس معاملے میں کسی طرح کی کوئی مداہنت پسند کرتے ہیں؛ بلکہ ایسا بھی دیکھا گیا ہے کہ قانون کی زد میں اگر آپ کا بیٹا بھی آ گیا ہے تو اس کے لیے بھی وہی موقف اپنایا ہے جو دیگر لوگوں کے لیے ہے؛ بلکہ بسااوقات اس سے بھی سخت ترین موقف دیکھنے میں آیا ، اسی طرح آپ کے اندر صبروتحمل کی بھی بے پناہ قوت موجود ہے، جس کی وجہ سےآپ کو کبھی سخت سے سخت بات پر بھی طیش نہیں آیا، اور نہ ہی کسی سے اپنے ذاتی معاملات کا انتقام لیتے ہیں، یقیناً یہ آپ کی اعلیٰ ظرفی اور وسیع النظری کا بیّن ثبوت ہے۔
آپ کی خوش طبعی اور شگفتہ مزاجی کا عالم یہ ہے کہ دارالعلوم کے جملہ اساتذہ آپ کے ساتھ تھوڑی دیر بیٹھ کر یہ محسوس کرتے ہیں کہ وہ اپنے رفقاء کی مجلس میں بیٹھے ہیں، بسااوقات ہم لوگ آپ کے دلچسپ قصوں، طنزومزاح کی باتوں، نکتہ آفرینیوں اور فنون لطیفہ اور دقیقہ سنجیوں سے محظوظ ہوتے رہتے ہیں، اور بے اختیار ہنسی وقہقہہ کی مجلسیں گرم ہوجاتی ہیں، گویا آپ بچوں میں بچے اور بڑے لوگوں میں بڑوں کی طرح رہتے ہیں، لیکن اس کے باوجود ہمیشہ متانت وسنجیدگی ، فرقِ مراتب اور وقار کا پہلو ملحوظ رہتا ہے۔
یہ سب وہ خصائل ہیں جن کی وجہ سے آپ جہاں کہیں بھی رہے ہر دلعزیز رہے، اور اس وقت بھی دارالعلوم محبوب یزدانی کے سارے اساتذہ آپ کو اپنا مشفق ومہربان اور مونس وغمخوار سمجھتے ہیں۔ ربّ قدیر انھیں ادارہ کی نظامت کے لیے حیات خضر عطافرمائے۔